Cołnowy korso 2015 jo był za lubinsku Domowinsku kupku wjelgin dobre dožywjenje. Teke lětosa su se zasej wobźělili. Lubinski šołta Lars Kolan jo za to serbske a tak jo jaden Domowinaŕ pla njogo na cołnje był. Šołta pokazujo se w zjawnosći w slědnem casu wjelgin cesto w běłem mantelu za serbskich muskich, tak teke na korso. Foto: G. Heyderowa 
Wěcej wó tom powědaś, co naše luźe wšykno gótuju a dojśpiju: To jo moto nowego rěda Nowego Casnika. We njom comy pśedstajiś Domowinske kupki a towaristwa ze swójimi luźimi a swójim zapalonym źěłom (2. źěl)
Gaž jěźoš na woglěd do lubinskeje Domowinskeje kupki, pón jo tebje nejpjerwjej snaź pitśku stysno. Kak tam buźo? Wjele luźi buźo tam?
Mysliš snaź na to, až jo ten zapalony załožaŕ lubinskeje kupki Měto Worak njezjapki wumrěł. A až jo tam jaden wjelgin aktiwny cłonk w slědnych lětach wustupił. Wěš teke, až ta kupka tuchylu njama žednogo wjednika.