Wót 18.10-21.10.2018 jo delegacija Domowiny se wobźěliła na seminarje FUEN (Federal Union of European Nationalities) słowjańskich mjeńšynow, kótaryž jo se wótměł we Hungorskej. Wót boka Serbow su se tam wobźělili Bjarnat Cyž ako zastupny prezident FUEN, Clemens Škoda a Frank Kosyk.

Byli smy gósći słowakskeje mjeńšyny we Hungorskej a smy mógali dožywiś rědnu prezentaciju słowakskego žywjenja we Hungorskej. Smy woglědali do hungorskego parlamenta a zgónili zajmne fakty wo mjeńšynowej politice we Hungorskej. Wósebnje zajmne jo było pśedstajenje strukturow šulstwa mjeńšynow we Hungorskej. How móžomy za serbske šulstwo wjele pśiwuknuś. Słowaki we Hungorskej maju 11 župow we wšakich regionach kraja. Woglědali smy tym Słowakam we bliskosći Budapesta.

Na seminarje su mimo Słowakow byli prezentne Słowjeńce z Awstriskeje, Chorwaty ze Serbiskeje, Serby z Chorwatskeje, Čechy z Chorwatskeje, Ruteny (Ruthenen) z Ukrainy, Ruse z Estniskeje a Pomaki z Bulgarskeje.