Z Barlinja/Berlin. Zwězkowy ministaŕ za wobchad (Verkehr) Andreas Scheuer jo wałtoru tyźeń zjawnje pśedstajił plan za nowu wobchadowu infrastrukturu 2030 (Verkehrswegeplan). We njom su nalicone wjelike infrastrukturowe projekty, we rěźe swójeje wažnosći, ak deje se wuwjasć. Mjazy nimi namakaju se teke inwesticije do zeleznice. Styri projekty z Łužyce su tam napisane, ale žeden wót nich njejo pśiwzety do zwězkowych projektow, ako maju prioritu. To su pó rědu: wutwaŕ zeleznice z Chóśebuza do Wrocława, z Chóśebuza do Baršća a z Drježdźan do Zgórjelca. Teke na tu wjelgin póžedanu drugu kólej (how: Gleis) z Lubina do Chóśebuza njejsu we planje glědali. Lokalne politikarje woblutuju, až Łužyca jo wordowała na boce wóstajona, rownož póderbi wósebneje pódpěry dla pśeměnjenja góspodarskich strukturow. To jo gronił mjazy drugim wušy šołta Chóśebuza Holger Kelch telewiziji Lausitz TV. Wón pomina wót nimskego zwězka wósebny program k wutwarjenju drogow a zeleznice w Łužycy.