Ze Slěpego/Schleife. Slěpjańska wejsna rada jo pócesćiła wjednicu Serbskego kulturnego centruma we jsy, Sylviu Panošynu, ze „Slěpjańskim mytom za angažement“. To jo k wěsći dał wejsny zastojaŕ Wolfgang Goldstein. (Wón jo wjednik slěpjańskeje šule a jo na tom dnju dostał Slěpjańske cesne myto z rukowu krajnego raźca Bernda Langego).

Myto dej cesćiś Panošynu za dłujkolětne, wutrajne a kreatiwne źěło we slědnych 20 lětach a jeje zwězanosć ze Slěpym kaž tež jeje angažement za serbsku kulturu, jo Goldstein gronił we swójej lawdaciji. Tak wóna spěchujo zgromadnosć, a pśez jeje źěło jo wjas wjele luźam znata. Wóna zwězujo serbske a nimske póbitowanja. Sylvia Panošyna jo za to dostała skulpturu slěpjańskego wuměłca Thomasa Schwarza.