Dwa wót tych wuzwólonych dolnołužyskich kandidatow za Serbski sejm – 18lětna Laura Grönertojc z Gołkojc a 49lětny Dirk Marx z Hogrozneje – njejstej swójo wu­zwólenje pśiwzełej. Město njeju stej stakim pśišłej do sejma dwa dalšnej kandidata (pó rědu dobytych głosow): Ilona Urbanowa (51) z Barlinja a Heiko Bengelstorff (41) z Wětošowa. Z togo „serbskego jědra“ Dolneje Łužyce, ze jsow mjazy Bórkowami a Janšojcami, źož serbska rěc jo žywa ako mamina rěc, njejo kandiděrował.

Slědujuce wótpósłane budu stakim we sejmje dolnołužyskich Serbow zastupowaś: 1. Hanzo Wylem-Kell (283 głosow), 2. Jan Kósyk (267), 3. Edith Pjeńkowa (207), 4. Stefanie Kósycowa (193), 5. Sandra Wylemowa (181), 6. Siegbert Budyšyn (163), 7. Kito Pjeńk (160), 8. Dirk Pawlik (138), 9. Christoph Haensel (106), 10. Carola Geppertowa (67), 11. Ilona Urbanowa (67) a 12. Heiko Bengelstorff (55).

Njelicymy-li teju wobspomnjeteju wótskóconeju sobu, ga su naslědku jano 13 kandidaty wó te 12 dolnoserbske města se wuběgowali. Ten jaden samy, ako njejo do sejma pśišeł, jo Udo Nikuš z Cerska (37 głosow).