Z Chóśebuza/Cottbus. To znate tšojenje wót teju dweju njeplekowu Maksa a Morica z pjera Wylema Buša jo wordowało sobotu tyźeń w koncertowem zalu měsćańskego konserwatoriuma na wósebny part wulicowane! Serbski ludowy ansambel jo kazał na „Maks a Moric – koncert we wobrazach z powědarjom za źiśi wót 6 lět“.

Wylem Buš (alias Pětš Cyž) jo lazował to tšojenje „we sedymich štukach“ wjelgin derje a cysće a z emocijami. Na serbske a nimske, pśi comž wobej rěcy jo šykowanje měšał: někotare werše jo zgronił we jadnej, druge we drugej rěcy. Žedne fragmenty jo wón teke spiwał. Ten serbski tekst jo z pjera Pětša Janaša – wón ga jo Bušowe wulicowanje pśestajił, a to serbske wudaśe, wjelgin rědnje wugótowane, jo wujšło 2014 we nakładnistwje Tintenfaß.

Na jawišću jo stojał wjelicki telewizor, wokšomjony kaž drogotna bilda, na kótaremž su se pokazowali zasobu te znate, originalne chytše bildki z Bušowych kniglickow. Źiśi su toś z wócyma wiźeli a wopśimjeli, což ten powědaŕ jo jim wulicował. A tych bildkow jo było telik, až njejsu za cas koncerta wubrachowali – kaž jadno pšawe comic-tšojenje.