Z Pódstupima/Potsdam. Wót lěta 2019 pśiźo wjele wěcej pjenjez wót kraja za serbske źiśownje. Kužde lěto budu wudaś 400.000 euro za serbsku rěc w źiśownjach.

Wóni su myslone za serbskorěcne pórucenja w źiśownjach Bramborskeje: lěc ako Witaj-projekt, ako cuza rěc abo ako wopóznawańska rěc. Góźba k tomu jo, až nosarje źiśownjow a hortow, zwětšego su to amty a komuny, njejsu wiźeli móžnosć financěrowaś separatne kupki za Witaj. Witaj-kupki su wjele mjeńśe ako te nimskorěcne. A te slědne su tuchylu pśepołnjone z wjele źiśimi. Na taki part jo nastała njewurownana situacija.

Nowe pjenjeze su myslone ako pódpěra za financěrowanje separatnych źěłowych městnow za Witaj-wótkubłarki a -wótkubłarje. Wokrejse w serbskem sedleńskem rumje deje te krajne pjenjeze kofinancěrowaś z 142.000 euro.

Nastaś dej z nowymi pjenjezami teke kita za konsultacije. Wóna buźo dawaś drugim źiśownjam dobru radu we nastupanju serbskeje rěcy.