Johannes Frano (Frahnow) z Drjenowa jo źinsa 88 lět stary. We młodych lětach, pó wójnje, jo wón wuknuł a źěłał źewjeś lět pla nana za štelmacharja. Franojc familiji ga gronje na serbske až do źinsajšnego dnja na serbske Štelmacharic, dokulž južo jogo stary nan jo to rucnikaŕstwo wugbał. A Johannes słuša k tym slědnym serbskim luźam, ako su we źiśecych lětach słyšali a nawuknuli serbske pomjenjenja za źěle wóza. Pěsta, der, špejchy, snice, kłonice, aksa, wójo, zastawk – te słowa wón zgronijo zasobu kaž pśi bjatowanju. We jogo młodosći ga su burja drjewjane wóze dali sebje pla štelmacharja zgótowaś. Teke te kólasa, ak su byli wót drjewa a wordowali ze zelezneju wobrycu wobrynkowane.