Z Drježdźan/Dresden. Kužda gmejna abo město we serbskem sedleńskem rumje w Sakskej buźo wótněnta wót kraja k lětu 5.000 euro za mócowanje serbskeje rěcy dostawaś. To jo wobzamknuł sakski parlament srjejź decembera. Wó to jo se pilnowała sakska serbska rada, za tym, ako su pśewjadli łoni we februaru to wuběźowanje Serbska rěc jo žywa.

Sakska buźo kužde lěto a mimo běrokratiskich zadorow 300.000 euro za ten „Serbski komunalny program“ nałožyś. Kužda serbska komuna dostanjo pawšalnje 5.000 euro, wóni njebudu musaś žedno póžedanje za nimi stajiś a teke nic dopokazaś, za co su je wudali.

W Sakskej jo 44 komunow ako serbskich pśipóznatych: 29 w budyšyńskem a 15 w zgórjelskem wokrejsu. Stakim budu wóni dostaś nagromadu 220.000 euro k lětu. Za te zbytne 80.000 euro dej se załožyś service-běrow, kótaryž buźo za komuny pśełožowaŕsku słužbu wobstaraś – jo Casnikoju groniła Maria Michałkowa, pśedsedaŕka sakskeje Serbskeje rady a něgajšna wótpósłana nimskego parlamenta.