To wjelike wokno pśi zachoźe do chóśebuskego Serbskego domu nadpadnjo pasantam ned. Eksponaty z keramiki a wšake dalšne artikele ludoweje kultury kaž tež figurina w serbskej drastwje wubuźiju zajm. Knigły ze serbskego ludowego nakładnistwa Domowina a dalšnych łužyskich nakładnistwow, cedejki, tež ze serbskeju muziku, wobraze a druge zajmnostki cesto wabje, aby stupili do Serbskeje kulturneje informacije LODKA.

Jaden woglědaŕ se rowno rozgranja z jeje wjednicu, 56lětneju Milenu Stockoweju. Muski zajmujo se za serbske póglědnice, tež historiskego charaktera. Wóna wulicujo jomu pśijaznje a z młogimi informacijami wšake zajmnostki a slězyny ako su zwězane z takimi póglědnicami. Woglědaŕ góspodarce LODKI kradu pśisłucha a se jej pón wjele pšaša, což wóna wěcywuznaśe wótegranja. Slědkoju kupijo se muski někotare póglědnice a se rozžognujo spokojom z Milenu Stockoweju .