Z Baršća/Forst. Tuchylu wobstoj tšach dla afrikańskeje swinjeceje mrětwy, ako pśima změstymi we groźach w pódzajtšnej Nimskej. Pśistym góda se na źiwjaki, až tu chórosć sobu rozšyrjaju. Dla takich powěsćow maju luźe za wšym zdaśim něnto tšach, źiwinowe měso kupowaś.

Wót źiwinowego měsa njewujźo žedna tšachota za cłowjeske strowje − taku oficielnu powěsć jo wózjawił nišy amt za wobzwarnowanje natury a jagaŕske nastupnosći w Baršću. Wóni su w decemberu pśewjadli góńtwu w Luboraskej góli, źož amtski skótny gójc dr. Helfried Kröber jo wulicował a pokazował casnikarjam, kak źiwinowe měso se pśeglědujo.

Wón a wjednik amta w Baršću Henrik Schur měnitej, až źiwinowe měso jo nadalej wjelgin strowe a gódne. Pśeto źiwina rosćo a pśiběra w góli mimo hormonowych preparatow a antibiotikow. Nježlic jelenjowe, sarnjece abo źiwjakowe měso se pśedajo, ga gójc jo nejpjerwjej pśeglědujo, lěc jo trichinate (von Trichinen befallen). Wósebnje w zymjem maju jagarje wjele měsa na pśedank, a Schur a Kröber skoboźitej luźi, aby jo kupowali.