Z Wětošowa/Vetschau. Na terenje šulskego centruma „Dr. Albert Schweitzer“ (to su zakładna a wuša šula a hort) planuju dalšne twarjenje. Ten nowy chrom dej wopśimjeś awlu a městno za kulturne zarědowanja. Teke městno za wobjedowanje a pśikuski dej nastaś. Tuchylna jěźarnja šule jo wjelgin wuska, tak až wukniki muse jěsć w etapach. Wšak maju dobrowólnu ceło-dnjowsku šulu, wjele wuknikow pśiźo how z busami a wóstanjo ceły źeń how. Za nich dej rědnej byś, gaž pśebywaju tak dłujko w šuli. Do nowego domu dej měsćańska biblioteka zaśěgnuś. Wšak dej ceły chrom wórdowaś městno za wuknjenje a kubłanje za ceły Wětošow. Biblioteku maju doněnta w źiśowni.

Šulski centrum ma južo něnto sportnišćo, sportowa hala jo wótcynjona sedym dnjow wob tyźeń a se stakim góźi za sport we lichem casu. Teke grajkanišćo mógu wšykne wětošojske wužywaś, gaž źiśownja a hort stej zacynjonej.