Z Chóśebuza/Cottbus. Drogowanje pśez cas – motiw, ak znajomy ze science-fiction-filmow – grajo we lětosnej zapustojskej inscenaciji Serbskego ludowego ansambla „To ga njamóžo byś!“ centralnu rolu. Premjeru w Komornem jawišću w Chóśebuzu pětk wjacor jo woglědało pśisamem 80 luźi.

To tšojenje zachopijo se we lěśe 1989, za cas DDR: Cłonki Statnego ansambla za serbsku ludowu kulturu wudaju se z busom do Wórjejc na pśedstajenje ptaškoweje swajźby. Na droze wordujo jich bus wót Marsianarjow wuwjeźony. Wóni njepśebywaju we swětnišću dlej ako poł štundy, ale na zemi jo we tom casu tśiźasća lět pśejšło. Gaž su zasej slědk w Łužycy a dojědu do Wórjejc, ga njewěźe hyšći, až jo južo lěto 2019.