Z města Brambor(g) pśi Haboli/Brandenburg. Tudejšna muzejowa „Słowjańska wjas“, kótaraž − kaž wjaska Serbski lud w Dešnje − dopomina na słowjańske załoženje Bramborga, jo wobgrozona. Frakcija CDU měsćańskego parlamenta co na jeje měsće twariś nowy hotel. Wót togo pišo casnik Märkische Zeitung.

Až hotel jo trjebny, jo za jich powěsću politiski konsens. Město co pśiwabiś wěcej turistow a jim lěpše pśenocowanje pórucyś. Dla fachowych kongresow, sportowych tšojenjow a organizěrowanych drogowanjow pśiźo do města dlej a wěcej luźi, a pótrjebnosć nowego hotela pśiběra. Zaprědka jo měsćańske zastojnstwo sebje wuzwóliło druge město, tak pomjenjony Packhof, ale pśeśiwo tym planam jo se zwignuł mócny protest tamnych wobydlarjow.