Ze Žylowa/Sielow. Na tudskej woklapnicy (glej powěsć pśipódla) jo šołta Bernd Rosumeck skjaržył na měsćańske zastojnstwo. Žylojske kśě njetrjebany trafo-torm pśi wótnowjonej Rizowej droze kupiś, a jen pśetwariś k wejsnemu pjacoju. Z energijowym koncernom, kótaremuž ten torm słuša, su se južo dawno wujadnali. Ale to wótkupjenje togo małkego flaka wót 15 m² wokoło torma, ako słuša městoju, wótleka južo wjele lět! Pśez take cynjenje wordujo iniciatiwa wobydlari docysta zadušona – jo Rosumeck se pógóršował.

Tejerownosći skjarže žylojske na to, až to póžedane pśizamknjenje wódy pśi sańkowej górje njejo se hyšći stało. Wóda se tam pótrjeba, dokulž pśi sańkowej górje se organizěruju swěźenje. Južo dwě lěśe se wó to pilnuju, ale zastojnstwo źaržy jim pśecej nowe pśedpisma a wustawjenja pód nos. Pěś raz su se dla teje wěcy zmakali, kuždy raz 13 paršonow pódla, a hyšći žedna droga k ciloju njejo se namakała.