Južo w drugej połojcy slědnego lěta su byli na pśedań prědne kalendarje na sćěnu – take z fotami za kuždy masec abo samo za kuždy tyźeń. Něco pózdźej – ale nic pśepózdźe – mamy něnt dalšny taki kalendaŕ, w kótaremž stoj ceło prědku to serbske, to Domowinske. Jo to kalendaŕ, kótaryž zestajujo Domowinska župa Dolna Łužyca a ten jo wósebnje myslony za młodych luźi, ako w Domowinje sobu źěłaju abo za serbske nałogi, drastwu a teke serbsku rěc źěłaju a se za to interesěruju.

Južo źaseś lět dłujko gótujo župa Dolna Łužyca taki kalendaŕ a ten jo mjazy tym wjelgin woblubowany. Wósebnje jo se za to póstarał młoźinski koordinator Helmut Matik, pódpěrowany wót župnego młoźinskego aktiwa. Wóni su za jadnotliwe mjasece wupytali fota, na kótarychž jo wiźeś, kak młode luźe w nimsko-serbskich jsach woplěwaju a swěśe zapust, kokot a druge nałogi, kak wóni sportuju a z dalšnymi wěcami se zaběraju.