Z Chóśebuza/Cottbus. Wuzwólowanje Rady Załožby za serbski lud su w Bramborskej priwileg Serbskeje rady. A toś ten wažny nadawk su dopołnili 24. januara. Na tom dnju jo było w chóśebuskem mešćańskem domje zjawne wobradowanje Rady za nastupnosći Serbow w Bramborskej.

Wót tych pěśoch cłonkow Serbskeje rady njejo se Marcus Końcaŕ oficialnje wobźělił, dokulaž jo sam kandiděrował za Załožbowu radu. Pśez to jo nastała situacija, až mógu te głosy tych styrjoch cłonkow rady patowu situaciju napóraś. A tak jo se napšawdu stało. Ale kšac pó kšacu.

Wót tych dogromadu dwanasćich kandidatow stej dwa swóju kandidaturu slědk śěgnułej: Markus Apelt a Heiko Bengelstorff. Wobej stej swój kšac z tym wob-twarźiłej, až maju tšach, až budu rěcnje wugranicowane a až njebuźo dosć na jich pówołańske kompetence źiwane. Pśedsedaŕ Serbskeje rady Torsten Mak jo implicitnu prowokaciju togo wobtwarźenja ignorěrował a jo wobyma wjeliki respekt wugronił za swóju kandidaturu rowno tak ako za slědkśěgnjenje kandidatury.