Lěto 1919 su Serby kradu wójowali za swóje nastupnusći, samo na mjazynarodnej rowninje. We wójnje jo serbske narodne gibanje było wobgranicowane, cełe ale njejo wumjelkowała. Serby su - nanejmjenej w Górnej Łužyce – byli organizěrowane w Domowinje. Pó nowemberskej rewoluciji jo Arnošt Bart (1879–1956) z Lětonja (Litten) sobu załožył Serbski narodny wuběrk. Do togo jo drogował pó Europje, pó Francojskej, Rusojskej a Rakojskej (Habsburgerreich) a 1890 zastupił do Maćice Serbskeje. W lěśe 1911 su jogo wuzwólili do Kralojskego Saksojskego sejma. Tam njejo był w žednej frakciji, a jo jadnał pó swójem konserwatiwnem a socialnem myslenju. W lěśe 1912 jo był mjazy załožarjami Domowiny a jo był jeje prědny pśedsedaŕ, do lěta1927.