Z Chóśebuza/Cottbus. Centralna olympiada serbskeje rěcy (COSR) za wuknice a wuknikow 6. lětnika Dolneje a Górneje Łužyce wótmějo se lětosa wót 8. do 10. apryla k 53. razoju pó zwuconej wašni w Zaružu (Wodowe Hendrichecy/Seifhennerdorf) w Górnej Łužycy blisko granice k Českej republice.

Mjasec do zachopjeńka jo pódpisało Serbske šulske towaristwo (SŠT), jeje wugótowaŕ, głowny organizator a zagronite, kooperaciske dogrono ze Źěłanišćom za serbske kubłańske wuwijanje Chóśebuz (ABC). Ta krajna institucija Bramborskeje buźo SŠT lětosa prědny raz oficialnje pódpěrowaś pśi dolnoserbskich nadawkach za olympiadu a buźo na městnje teke prezentna z fachowo-pedagogiskim a rěcnym pśewóźowanim.