Ze Slěpego/Schleife. Slěpjański serbski kulturny centrum (SKC) jo zběrał wót lěta 1998 serbske jatšowne jaja. Aktualnje jo jich licba 1.165 jajow w tradicionalnych serbskich technikach.
Z takim wobšyrnym wobsejźeństwom, tak su se myslili sobuźěłaśerje kulturnego centruma, mógu teke sami wustajeńcu wugótowaś a njebudu žednego drugego pšosyś.
Toś su wótwórili 15. měrca wustajeńcu „Ei trifft Becher – Jejko sedźi w nopašku“. Wustajeńca buźo pśistupna až do 28. apryla.
Jaja zběrki SKC maju wusoku wuměłsku a rucnikaŕsku kwalitu. Nastała jo zběrka na dwójaki part.
K prědnemu njebjeru žednogo płaśonka za wobźělenje na jatšownych wikach. Wupšosyju sebje pak jadno jajo kuždego wustajarja.
Drugi zakład zběrki su te wuběźowanja wó nejrědnjejše jatšowne jajo z lět 1998 do 2013. We tom casu su 33 žeńskich a šesć muskich dogromadu 502 jajow zapódali. Wóni su pótom wóstali w wobsejźeństwje SKC. Wjele wót nich jo se wobźěliło kužde lěto na wuběźowanju; na taki part jo se taka radna licba jajow nazběrała.