Wón jo glucny, až źěła wót 1. oktobra łońskego lěta ako lichy sobuźěłaśeŕ w muzikowem wótźělenju pśi Serbskem rozgłosu rbb w Chóśebuzu. Ja namakaju 28lětnego Gregora Kliema we jogo źěłarni na stwórtem nastwaŕku wjelikeje wjaže rbb, źož jo rowno zabrany: wón zestajujo gromadu muzikowy program za pśichodne serbske rozgłosowe wusćełanje.

„Ja mam něnto źěło, ako se maka z mójim studiumom na pólu etnomuzikologije, ak som łoni ako master dokóńcował. Lěpjej njamóžo se mě zejś“, měni młody Serb. Kradu widobne znamje, až cujo se w redakciji radija kaž doma. To źěło njejo jomu cuze, pśeto južo za cas studiuma jo pśipódla źěłał ako awtor za chóśebuski rozgłos, teke za lipšćański lichy rozgłos. Někotare lěta. Něto pak njejo wěcej awtor, ale lichy sobuźěłaśeŕ z nadawkami we wobłuku muzikowego wótźělenja.

Gromaźe ze Sebastianom Elikowskim-Winklerom zastupujo wón muzikowego redaktora Ulija Pogodu, kótaryž jo južo dlejšy cas chóry. „Nadawki su za mnjo zajmne a su wjelike wupominanje, pśeto ja cu je z kreatiwitu a nowymi idejami wugbaś.“