Z Dešna/Dissen. 28. měrca jo póbył w Chóśebuzu a Dešnje wusoki woglěd. Howko jo pśišeł dr. Bernd Fabritius, zagronity za pšašanja wusedlarjow a narodnych mjeńšnow w Nimskej.

Pśisamem jadno lěto ma dr. Fabritius toś tu funkciju a jo wjadł we tom casu južo kopicu rozgronow ze zastupnikami Serbow. Ale woglěd kóńc měrca jo był ten prědny oficialny woglěd Fabritiusa pla Serbow.

Až jo pśišeł k Dolnoserbsam a nic do Górneje Łužyce, ma cyniś z jadneju wót jogo premisow: Šym słabša jo jadna rěc abo mjeńšyna, śim wěcej dej se spěchowaś. Wón sam ga jo cłonk nimskeje mjeńšyny w Sedymgrodskej/Siebenbürgen a jo dožywił, kak su se wobstojnosći kradu k špatnemu mjeńšyny wuwijali.

Swój woglěd pla Serbow jo zachopił Fabritius w Serbskem domje w Chóśebuzu. Tam jo wobźiwał nejpjerwjej Lodku a te rědne a mudre serbske eksponaty, ako tam pśedawaju. Pótom w klubowni su jomu zastupniki Serbow w rozgronje rozkładowali, kak dožywiju tuchylnu situaciju Serbow a co dejało se z jich perspektiwy nejwěcej změniś.