Na majskem swěźenju w Lubinje 2018 jo było južo wjele luźi w drastwje pśipódla. Se wě, až buźo jich srjejź maja lětosa na drastwinem swěźenju hyšći wjele wěcej. Foto: Město Lubin 
Z Lubina/Lübben. Wót 17. do 19. maja buźo w Lubinje wjeliki ruš z wjele drastwami. Tam ga buźo Nimski swěźeń drastwy. A jadna wót głownych organizatorkow, Marion Knorr z Husa, měni k tomu: „To buźotej dwa dnja remmidemmi bźeze kóńca“. Wócakaju 2.500 drastwynosaŕkow a -nosarjow. A to nic jano z Nimskeje. Teke z wukraja pśidu: z Hollandskeje, Pólskeje, Ukrainy a samo z Brazilskeje. Organisatory pak se wósebnje wjasele, gaž mógu wjele serbskich luźi we swójich drastwach witaś. „Z tym smy wabili, až jo Łužyca region drastwynosaŕkow“, jo Marion Knorr měniła k Casnikoju.
A drastwynosaŕkam se w Lubinej teke wjele bitujo. To su nejpjerwjej programy z wjele regionow, na pśikład Münchner Duschpolka (sobotu zeger 10:30); Platteln a Goaßlschnalzen (Peitschen knallen) (sobotu zeger 11:15) a wjele polkow tak ako drugich rejow. Cesto jo live-muzika pśipódla.
