Z Chóśebuza/Cottbus. Wšojadno lěc we familiji abo w źiśowni: starjejše, ako kśě swójim źiśam nawucyś serbsku rěc, njedeje starosćiwe byś, gaž góle dłujki cas njepowěda serbski. „Rěcna eksplozija“ stanjo se akle pó dłujkej „receptiwnej fazy“, źož góle wuknjo serbsku rěc dlej a lěpjej rozměś, ale samo pśi tom aktiwnje serbski njepowěda. To se wuznajo z nazgónjenjow, ako su nazběrali ze źiśimi z nimskorěcnych familijow w žylojskej Witaj-źiśowni. To jo zachadny stwórtk w Dolnoserbskem internaśe starjejšym wulicowała dr. Jana Šołćina, fachnica za serbsku didaktiku na Instituśe za sorabistiku w Lipsku. Wóna jo proces pśiswójenja serbskeje rěcy we Witaj-źiśownjach pśespytowała.

Rěcny centrum Witaj, na pógónjenje serbskorěcnych familijow, jo take rozgrono dla dwójorěcnego kubłanja źiśi organizěrował. Starjejše su mógali sobuźěłaśerjam Rěcnego centruma Witaj a dr. Christianje Piniekowej z A.B.Ceja pšašanja stajaś.

Starjejše su zgónili, až měšanje rěcow, tak pomjenjony code-switching, jo pla dwójorěcnego góleśa normalna kšoceń na droze k nawuknjenju mjeńšynoweje rěcy.