„Kněni Judith Kubicec jo we domje. Wóna ned pśiźo“, groni sekretarka w Serbskem ludowem ansamblu ku mnjo. Wóna stupijo pón dypkownje do sekretariata , pšosy mě zdwórliwje do swójeje pódlańskeje źěłoweje śpy. Wót wujśpurneje žeńskeje wuchadatej energija a kreatiwnosć. „Mam jano góźinku casa. Drugi dalšny wažny termin na mnjo caka“, groni na zachopjeńku naju rozgrona.

Planowanje a organizěrowanje probow a wustupow ansambla, dobywanje režiserow za nowe kulturne projekty kaž tež dalšne aktualne wuměłstwowe źěła w domje SLA laže wót 1. awgusta 2018 we rukoma toś teje Serbowki. „Ako intendantka som zagronita za wšykne wuměłske nastupnosći orchestra, chora a baleta. Z nimi se za mnjo něto wšykno kompriměrujo, což som w 30 lětach na wuměłskem pólu nazgóniła. To jo rědne a zajmne wupominanje, lěcrownož cesto teke napominajuce. Ale to ja trjebam.“