Srjejź maja su někotare wuknjeńce za wótwardowanje chórych a starych z Travnika w Bosniskej pśebywali w Chóśebuzu. Pśišli su na pśepšosenje Łužyskeje akademije za góspodarstwo a strowotu, źož wóni teke wuwucuju młode luźe w wšakich pówołanjach.

Jadna jich stacijow jo był Dolnoserbski gymnazium. Dnja 10.05. su jim how wukniki a wuknice 9. lětnika młoge aspekty serbskego luda pśedstajili. Zgromadnje z ceptaŕku Angelu Šurmanoweju a ze zagroniteju za serbske młoźinske źěło w Chóśebuzu Francisku Albertoweju su 4 zajmne stacije za gósći z Balkana pśigótowali. Tak su prezentěrowali žedne serbske drastwy, su wulicowali wó serbskich stawiznach a wó wuwijanju našeje serbskeje šule, su serbske nałogi wujasnili a zgromadnje z gósćimi serbsku a bosnisku rěc pśirownowali a serbskej spiwa „Stoj ta lipa“ a „Wjasele źinsa“ nazwucowali.