Program Šule za dolnoserbsku rěc a kulturu w Chóśebuzu jo pśecej wjelgin wobšyrny a bogaty. To njejsu jano kurse, seminary, pśednoski a wšake pleinairy, ale teke zgromadne ekskursije. K tomu słušaju głownje take jězby do susedneje Pólskeje.

Za lětosa ma šula take wulěty mjazy drugim pśedwiźone do Kostrzyna/Küstrin. Interesa za to jo wjelgin wjelika, samo tśi raze se tamkor do togo města pśi Odrje a Warśe, ned za granicu, lětosa wupóraju. Mjazy tymi, ako su se za to pśipowěźeli su młoge, ako wuknu na serbskej rěcnej šuli we wšakich kursach mimo dolnoserbskeje pilnje pólsku rěc. Pśi takej jězbje a pśi pśebywanju w Pólskej ga mógu to, což su nawuknuli, teke nałožowaś a trjebaś.

Prědnu taku cełodnjownu jězbu su wugótowali 9. maja. Mjazy tymi 50 wobźělnikami su byli žedne z Drjenowa, z Groźišća, ze Žylowa, z města a z lubnjojskich stronow. Pśez Picnjo, Miłoraz su se dostali nejpjerwjej do Frankobroda, źož su pśestupili pśez wjeliki Odriny móst granicu do Pólskeje. A pón hyšći něźi 50 kilomejtari, a južo su byli w Kostrzynje, w měsće z něźi 17.000 wobydlarjami.