Wendisch abo sorbisch?

Ze zaměrom pokazaś swójim luźam serbske Błota, som pśigótował dalšnu staciju: Na cołnje pó Lubinje, wót hotela Van der Valk, w dogronje wupisane: »Kahnrundfahrt um Lübben, mit Tisch exklusiv im Kahn, mit Imbiss, Getränke ... Kahnfahrt ab Hotelbar«. Ako som toś to dogrono pśed lětom na městnje w hotelu Van der Valk pódpisał, som wiźeł pśed woknom gaśik a za nim błośańsku ławku pśez groblu. Ako jo něnt tak daloko było a my smy tam cakali a se za cołnoma rozglědowali, su nam w recepciji gronili: Cołna cakatej na was w Lubinje, 8 km wót tudy. How njejo žeden zwisk k wódam Sprjewje. Wót našeje »Hallenbar« se z taksu abo busom k wustawadlišću do Lubina dojěźo! To njejo w dogronje napisane było. Gaśik a ławka stej kumštnje natwarjonej ako znamje, až słuša Van der Valk ku Błotam.