Z Pódstupima/Potsdam. Ako Thomas Domres, prignicański wótpósłańc Lěwice w Bramborskem krajnem sejmje, měni, jo Bramborska se kradu pjekoriła a źěłała za spěchowanje domorodněje dolnonimskeje rěcy w zachadnych źaseś lětach. Za njogo jo něnt wuźěłanje bramborskeje strategiji za dolnonimsku rěc na rěźe. Wšak dej politika hyšći wšake napóraś, aby dolnonimska rěc była zawěsćona we wšakich wobłukach, na pśikład což nastupa kubłanje, kulturu, medije a zastojstnwo (pó Europskem dogronje wó mjeńšynach). To deje zdaśim Domresa krajne politikarje zgromadnje z powědarjami dolnonimskeje rěcy.

W Bramborskej jo jano mało aktiwnych powědarjow dolnonimskeje rěcy, a žeden zwisowaty rěcny teritorium njejo. Togodla jo śěžko, tu rěc w źiśownjach a šulach spěchowaś a źaržaś. Jadnotliwe póbitowanja zwenka šulow pak su, w Demerthinje, Putlitzu a Sewekowje (wšykne w Prignicu). Až take projekty su, jo wuspěch cesnoamtskich angažěrowanych we tych stronach. Kraj Bramborska dej pó zdaśim Domesa nadalej spěchowaś take projekty.