Gaž maju pacienty na njeźelach a na wótpołdnjach swój lichy cas, njemuse ten cas jano pśepóraś w měsće, ale mógu se „wuleśeś“ do bliskich stronow a tšochu dalej. Tych móžnosćow a póbitowanjow za take wulěty a jězby jo wjelgin wjele. Chtož ma lušt, njamóžo se z wjelikim abo mjeńšym busom jano pódaś do bliskeju městowu Trenčin a Trnava (jomu se groni dla kšasneje stareje architektury „mały Rom“), ale dalej. Na pśikład něźi 100 kilomejtari do głownego města Bratislava, źož mógu tež woglědaś do teatera a do opery, do Wiena (něźi 150 km) abo samo do Budapesta (wokoło 200 km).