Z Města/Cottbus. Srjodu tyźeń jo wušy šołta Holger Kelch w chóśebuskej radnicy krajnego zagronitego za nastupnosći Serbow a statnego sekretarja Tobiasa Dünowa tak ako te zagronite za serbske nastupnosći wokrejsow Górne Błota-Łužyca, Dubja-Błota a Sprjewja Nysa a města Chóśebuz pówitał. Gósći su se tam zmakali na prědnu Krajnu konferencu bramborskego zagronitego z regionalnymi zastupnicami. Krajna konferenca zagronitych za serbske nastupnosći pšawidłownje se wótměwa, aby se wó aktualnych temach a wó spěchowanju dolnoserbskeje rěcy a kultury wobradowało. Tenraz su powědali mjazy drugim wó nowelěrowanem „Sorben/Wenden-Kostenerstattungsverordnung“, šulskem póstajenju za Serbow a wó dwójorěcnosći we wobchaźe.