Z Města/Cottbus. Južo łoni na kóńcu lěta jo pśedsedaŕstwo Domowinskeje župy Dolna Łužyca zachopiło diskusiju wó tom, pó kótarej droze móžo se dolnoserbska rěc nejlěpjej rewitalizěrowaś – to groni zdźaržaś, woplěwaś, rozšyrjaś a dalej wuwiś. Lětosa co župa to intensiwnje dalej wjasć, což jo se slědny tyźeń wałtoru stało, gaž jo se župne pśedsedaŕstwo zmakało w Serbskem domje k swójomu drugemu wobradowanju w lěśe 2021. Wobźělili su se teke Měto Nowak, serbski referent w bramborskem ministaŕstwje za kulturu, wědomnosć a slěźenje, Kito Ela a Maksimilian Hasacki, cłonka Zwězkowego pśedsedaŕstwa Domowiny.