Na kóńc slědneje swětoweje wójny móžo se pisaŕ toś tych słowow derje dopomnjeś: Ako źewjeślětny gólc stoj wón z mamu a žednymi drugimi šćit pytajucymi žeńskimi za murju brožnje. Ze slědka stśělaju nadpadniki Hitleroweje dewizije feldmaršala Schörnera na rusojskich a pólskich wójakow 1.Ukrainskeje fronty, kótarež njejsu z takeju mócneju nimskeju napśeśiwneju ofensiwu zachopjeńk maja 1945 wěcej licyli. W tej „dolinje smjerśi“ (za kloštarjom w Pančicach) su w slědnych dnjach wójny hyšći hunderty młodych kjarlow padnuli. Wětšy źěl z nich su byli ranjone lacaretoweje kolony a njejsu mógli docasa wuběgnuś. W Chrósćicach (blisko Kamjeńca) na nich pomnik dopomina. Ferdinand Schörner („Feldmarschall der letzten Stunde“) jo se kśěł ze swójimi „doškrabnikami“ až do Barlinja pśedrěś, Hitleroju na pomoc a pón... (Führer pak jo juž měł rewolwer za sebje nalodowany.)