Cłonki tradiciskego towaristwa „Pśěza“ su měli wjelicku ideju, ako jo wó to šło, kak budu swěśiś 25. jubilej swójogo wobstaśa. „My njejsmy kśěli daniž se sami pśepokazowaś daniž našym partnarskim towaristwam kazaś, aby nam k cesći rejowali. My smy skerjej kśěli něco praktiskego gótowaś, což luźam we spomnjeśu wóstanjo a buźo traś“ – wulicujo nam pśedsedaŕ Jörg Maznik (Masnik). Toś su pśistajili bulgarskego ceptarja za reju Gregorija Marjanowa. „Pśez Gregora Kliema smy južo pjerwjej měli kontakt k njomu, a stakim smy se jogo pšašali, njeby-li kśěł nam a našym gósćam něco nowego nawucyś. Nowe kšocenje abo druge elementy reje“. Ten ceptaŕ jo gronił „jo“! A z tym pśigronjenim su akle chopili ten njewšedny burstak planowaś.