Dłujka casowa perioda atomoweje energije, z kótarejuž su sebje luźe swójo „rědne“ žywjenje w śopłych a swětłych śpach wugótowali, chyla se swójomu kóńcoju. Atomowe elektraŕnje su tšašne. Nic jano, dokulaž jo Rusam jadna rozleśeła a pózdźej Japanarjam teke hyšći jadna. Ze škódnymi slědami teju katastrofowu změjo cełe ludstwo hyšći... nichten njewě wjele generacijow pó nas ... cyniś.

BGE! Za tymi tśimi pismikami štycy towaristwo: Bundesgesellschaft für Endlagerung. BGE ma kněžarstwowy nadawk, na teritoriju Nimskeje za stronami a krajinami slěźiś, w kótarychž mógu se radioaktiwne wótpadanki wusłužonych elektraŕnjow pód zemju zakopowane chowaś. Nic jano chylku, ale někotare towzynty lět, daniž njejsu słabe dosć, až njamgu cłowjestwu na škódu byś. Ale do togo casa njesměju - bogalka!- žednje kusacki swójich radioaktiwnych promjenjow na zemju pušćaś.