Njedawno jo se wótměła centralna Olympiada serbskeje rěcy. Na njej jo se wobźěliło nagromadu 68 wuknikow z Górneje a Dolneje Łužyce, wšykne su wukniki 6. lětnika. Studenty za wuceński amt serbšćina su pódpěrali ceptarjow a se sobu starali wó źiśi. Mjazy nimi jo był Damian Dyrlich (napšawo stojecy). Wukniki z Dolneje Łužyce stej pśewóźowałej Margot Hašcyna (slězy nalěwo stojeca) a Jenifer Dünnbierojc (prědku nalěwo stojeca). 
Wodowe Hendrichecy/Seifhennersdorf. Centralna Olympiada serbskeje rěcy dej wuknikow serbšćiny wuskoboźiś a pógóniś. Wóna dej w nich wubuźiś gjardosć na to serbske a mócowaś identitu. Lětosna olympiada jo se wótměła k 50. razoju, a to wót 18. až do 20. apryla. Serbske šulske towaristwo organizěrujo olympiadu wót 25 lět gromaźe z wjele dobrowólnymi a cesnoamtskimi mócami. Wó stawiznach olympiady połnych dožywjenjow, wó jeje wuwijanju a jeje lětosnych wopśimjeśow jo Andreas Kirschke se rozgranjał z Ludmilu Budarjoweju, pśedsedarku Serbskego šulskego towaristwa.
Kněni Budarjowa, kak jo tomu dojšło pśewjasć serbsku olympiadu a co su byli pśicyny za to?