Ze Slěpego/Schleife. Něnt jo jasne, chto buźo Domowinu 2021 do 2025 nawjedowaś. To jo se rozsuźiło slědnu sobotu, ako jo Domowina pśewjadła w nowem serbsko-nimskem šulskem centrumje w Slěpem, w župje „Jakub Lorenc-Zalěski“, swóju 20. głownu zgromaźinu. Na njej jo tych 102 delegatow a delegatkow ze 50 Domowinskich župow a 13 nadregionalnych serbskich towaristwow wuzwóliło wósoby a gremije za nejwažnjejše Domowinske amty.

Dowěru ako pśedsedaŕ Domowiny jo dostał wótnowotki 37lětny Dawid Statnik, za kótaregož jo 98 delegatow a delegatkow głosowało. Jogo zastupujotej Hartmut Leipner z Dolneje Łužyce (88 głosow), ako jo prědny raz we toś tej wažnej funkciji nastupił, a Marko Hančik (87 głosow) z Radwora (Radibor) w Górnej Łužycy.