Chóśebuz/Cottbus. Na wobradowanju serbskego wuběrka wokrejsa Sprjewja-Nysa (SPN) 27. apryla su powědali wó financielnem wurownanju gmejnow w serbskem sedleńskem rumje. Serbska kazń wót junija 2014 lubi gmejnam w sedleńskem rumje wurownanje za pśidatne wudanki za to serbske. Tuchylu wuźěłaju za to w Pódstupimje dokradne pśedpisy, kak dej se to do statka stajiś. Wó tom jo informěrował na tom pósejźenju Měto Nowak, referent zagronitego za serbske nastupnosći w Bramborskej, Martina Gorholta. Hyšći lětosa dej se ten pśedpis w Pódstupimje wobzamknuś.

Su wuźěłali system za pawšalne wurownanje, kótarež kužda gmejna w serbskem sedleńskem rumje lětnje dostanjo. Wóno jo myslone za mjeńše kosty, gaž na pśikład trjebaju pśestajenje za amtske łopjeno abo kśě jadno serbske zarědowanje pódprěś. Toś tu pawšalu njemuse wótlicyś, muse za nju ale pšosbu stajiś. Wóna se płaśi za cas wót płaśenja noweje serbskeje kazni, to groni wót srjejź 2014.