Zachadny kóńc tyźenja smy zasej dostali zaśišć festiwalowego lěśa we Łužycy. Festiwala „Elbenwald“ a „Stuss am Fluss“ stej byłej w měsće, a pětk źo dalej z „Wilde Möhre“ w Drjowku – Łužycanarje, lěc Nimce, Serby abo druge, póžywaju tam cas mjazy žwałoma pandemije. Kóńc awgusta se zachopijo k drugemu razoju „Lausitz Festival“, kenž běžy až do srjejźi septembera. Patrona kraja pśesegajucego festiwala stej ministaŕskej prezidenta Bramborskeje a Sakskeje, Dietmar Woidke a Michael Kretschmer.

Ako gronidło za lětosne wudaśe togo decentralnego festiwala su se wumyslili słowo „Zwischensamkeit“. Z tym słowom, ako stoj w zawjeźeńskem teksće festiwaloweje brošurki, kśě organizatory „etiketěrowaś“ cuśe, byś na wósebnem „progu mjazy casami a rumami“. Koncept festiwala se pótakem póśěgnjo na strukturnu změnu w Dolnej a w Górnej Łužycy. Někak se pak zda, až njegraju wobydlarje Łužyce we njom žednu wósebnu rolu. Pśestajiś do serbskeje rěcy se „Zwischensamkeit“ tak pšawje njedajo, jasnje pak jo: Daniž taki wopytk elokwentnosći, daniž festiwal njamatej nic cyniś ze serbskeju „mjazsobnosću“.