Komentator Maks Bagańc jo w Nowem Casniku dnja 5. awgusta 2021 swójo njerozměśe wupowědał, až na łužyskem festiwalu „Zwischensamkeit“ njeglědaju na serbstwo. Se wě, kumštne słowo „Zwischensamkeit“ njedajo se lažko do serbšćiny pśełožyś, ale teke mója nimska śota njeby to nimske słowo rozměła. Za swěźeń serbskeje literatury w Lubinje jo se gano něchten moto „Drogostki ze słowami“ wumyslił. To rozmějoš tež jano, wěš-lic, až jo to pó nimsku „Wortschätze“.

Ale až „Zwischensamkeit“ njama serbski późěl, njejo za mnjo žeden źiw. W zachadnych tśiźasća lětach som zgónił, až glědaju zarědowarje zwětšego jano na serbskosć, gaž serbski luź sejźi w rozsuźecych gremijach. To płaśi za politiku rowno tak ako za turizm abo kulturu. Tak namakajoš w Sakskej w strońskem programje za zwězkowe wólby w nazymskem (póžnjeńcu) jano pla CDU wugronjenja k Serbam, a to, lěcrownož na pśikład Lěwica jo pśecej serbske iniciatiwy pódpěrowała.