Z Popojc/Papitz. Kóńc zachadnego tyźenja su swěśili w Popojcach w gmejnje Gołkojce wažny jubilej. Rowno tak ako Wjerbno a Brjazyna jo se toś ta serbska wjas rowno pśed 675 lětami prědny raz pisnje wobspomnjeła w starej urkunźe.

Prědny wjerašk su wobydlarje a jich gósći dožywili pětk wjacor. Wóni su byli do wejsneje cerkwje pśe-pšosone na prezentaciju wejsneje kroniki, za kótaruž su wušej pěś lět dłujko źěłali. Na 230 bokach jo z młogimi artikelami a z wjele fotami pśedstajona dłujka historija teje jsy. Mjazy drugim zgóniju cytarje teke wjele wó serbskich nałogach a tradicijach a drastwach a wó tom, kaku rolu jo grała w žywjenju jsy serbska rěc. Wutšobnje stej se Enrico Dalic, wejsny prědkstojaŕ, a Karsten Schreiber, nowy šołta wjelikeje gołkojskeje gmejny, w mjenju wšych wuźěkowałej pla tych styrich głownych awtorow wejsneje kroniki „Papitzer Geschichte und Geschichten“. Su to Jutta Linkow, Karolin Krausojc, Kati Gerstnerowa a Ingo Höhne.