Wulětarje, ak su pó kólasu na stupnem stwórtku abo swětki w našych stronach ducy, znaju zawěsće ten stary chrom na Majberku. Wón stoj nižej kólasoweje drogi, ak wjeźo pó rěcnem damje z města do Błotow. To jo drjewjana baraka, ze šarmom 60tych lět, ak wabi kólasarje až do źinsajšnego dnja k wustaśu. Ale chto znajo jeje historiju? Wóna jo gano wordowała 80 lět stara.

„Wóno jo k późiwanju, kak derje to drjewo se jo zeźaržało. Wóno ga jo zatwarjone wót lěta 1936! Jano źěl cergow smy musali pórěźiś, pśeto wóni su se zekśiwili a dołojce chopili rozpadowaś. Wacej jo wšo w rěchu“, wulicujo Klaus Kretschmer, ak jo z historiju teje baraki wusko zwězany. Ten 75lětny muski ma doma wjele dokumentow, ak ju dokumentěruju.