Nowy Casnik jo se za naše kśesćijańske cytarje na drogu dał. Smy se zmakali z dr. Christianom Stäbleinom. Wón jo nowy promšt (Probst) našeje cerkwje a ma stakim pśeliš wusoku funkciju. Smy kśěli wót njogo wěźeś, kake nastajenje wón ma napśeśiwo Serbam. Se wě, až smy byli teke we drugich nastupnosćach narske. Rozganjała jo se z nim Ines Neumannojc.
NC: Kněz Stäblein, Wy sćo promšt (Propst) krajneje cerkwje Barliń-Bramborska-šlazyńska Górna Łužyca (EKBO). Co to popšawem jo, jaden promšt?
Christian Stäblein: Ten promšt jo wjednik teologiskego wótźělenja w konsistoriumje a stakim za cełu cerkwju. K tomu słušaju wósebnje zasadne pšašanja teologije, wěry a cerkwinskego žywjenja. Promšt jo stakim wjednik za wšykne teologiske zasadne pšašanja. W EKBO jo promšt rownocasnje zastupnik biskupa.
Ako wěm, sćo wót srjejź awgusta nowy promšt našeje cerkwje. Pśedstańśo se pšosym našym cytarjam.