Z Lunda/Lund. W ramiku cyklusa pśednoskow ku kulturje a rěcy Šwedow, Nimcow a drugich jo Towaristwo partnaŕskeju městowu Lund a Greifswald organizěrowało 24. apryla w tak pomjenjonej lundojskej Katedralowej šuli (gymnazium) pśednosk k Serbam. Pśednosk „Serby w lěśe 2024 – kultura, politika a rěc“ jo źaržała zasłužbna wědomnostnica dr. Madlena Norbergowa, kótaraž jo pśepšosenju pśedsedaŕki towaristwa partnaŕskeju městowu ze Šwedskeje a Nimskeje Gunnel Holm z Lunda slědowała.

Jadnab 40 pśiglědowarjow jo pśichwatało na pśednosk, mjazy kótarymiž su byli cłonki górjejce pomjenjonego šwedsko-nimskego towaristwa ako teke pśistajone Lundojskeje uniwersity, ako na pśikład prof. Barbara Törnquist-Plewa z Katedry za srjejźnoeuropejske a pódzajtšnoeuropejske studije, kótaraž jo to šwedsko-nimske towaristwo pógnuła, tematiku Serbow w Lunźe pśedstajiś a jo zwisk mjazy licheju sorabistku Madlenu Norbergoweju a pśedsedaŕku towaristwa Gunnel Holm zmóžniła.