Z Města/Cottbus. Tuchylna wósebna wustajeńca w klubowni Serbskego domu pśedstajijo stawizny Towaristwa za spěchowanje serbskeje rěcy w cerkwi z.t. (STSRC), wót jogo załoženja dnja 14. apryla 1994 do źinsajšnego casa. K cesći 30-lětnego jubileja su cłonki towaristwa toś tu wustajeńcu z Lodku pśigótowali a ju stwórtk, 25. apryla, wótwórili. Mimo pśedsedarja towaristwa dr. Hartmut Leipner, kenž jo ku tej góźbje nagrono źaržał, jo serbska faraŕka Katharina Köhlerowa z Dešna mału nabóžninu z woglědarjami swěśiła a wušy konsistorialny raźc dr. Clemens Bethge (EKBO) glukužycenja z boka ewangelskeje cerkwje Barliń- Bramborska- Šlazyńska-Górna-Łužyca sobu pśinjasł.