W domje šularja w Hajnku (Hähnchen) jo se 6. oktobra 1785 naroźił Johann Georg Zwahr – serbski Hanzo Juro Swora. Słownik, kenž jo wón wuźěłał – jogo „Niederlausitzisch-wendisch-deutsches Handwörterbuch“ (Grodk 1847) – płaśi ako prědny śišćany dolnoserbski słownik. Jo to była wjelika, weto w dalokej měrje pódgódnośona zasłužba togo Serba, kenž jo se pó źiśetstwje pušćił na gymnazium w Chóśebuzu a pótom na studium teologije do Halle nad Solawu. 1812 jo pśišeł ako faraŕ do Tšadowa (Stradow), źož jo až do swójeje smjerśi 19. julija 1844 – pśed 180 lětami – swójej wósaźe prjatkował.