Z Města/Cottbus. W Bramborskem žeńskecem tyźenju, ako jo se južo wótměł 35. raz, jo zasej wjelgin zajmny serbski pśinosk na programje stojał. Župa Dolna Łužyca a załožba „Rosa Luxemburg“ stej wugótowałej wjacor k temje „Marja Grólmusec – k aktualnosći njepśiměrjoneje“. Filozof dr. Gerd Rüdiger Hoffmann a něgajšna źiwadłownica Hanka Rjelcyna stej z citatami a sekwencami ze žywjenja Marje Grólmusec pśestajiłej toś tu skobodnu wósobinu, ako se njedajo do wěstego facha tłocyś. Wóna jo była rowno tak Serbowka a katolka ako teke socialistka, antifašistka, woboraŕka a mały kus samo feministka. Tak jo na kuždy pad była doprědkaŕska we swójom myslenju a zwenka wšyknych serbskich konserwatiwnych mustrow. Za swój politiski angažement jo musała górko śerpjeś w popajźeństwje Waldheim a pózdźej w KZ Ravensbrück, źož jo teke wumrěła. Móžomy ju z połnym pšawom teke pomjeniś martraŕku.