Z Města/Cottbus. Digitalna technika a z tym zwězana digitalizacija pśewóźujotej nas na kuždem pólu žywjenja, a to mjaztym wěcej lětźasetkow dłujko. Glědajucy na wužytk pśi wuchowanju serbskeje kultury, pósrědnjenju serbskeje rěcy a wědy wó serbskej mjeńšynje jo digitalizacija w Serbach notny kšac na droze do pśichoda. Ale zakład za to jo teke wědobne rozestajenje z toś teju wobšyrneju tematiku, z jeje wužytkom a škódami. Rownocasnje jo toś ta tema pśewjelika, aby my ju w swójej cełkownosći rozměli. Aby nam pśibliženje k tomu nanejmjenjej lažčej padnuło, jo Serbski institut (S.I.) gromaźe z Bramborskeju techniskeju uniwersitu Chóśebuz-Zły Komorow (BTU) a DomPro gGmbH na transdisciplarny forum a wiki pód motom „Serbske žywjeńske rumy w digitalnem casu“ pśepšosył.