W slědnem wudaśu Nowego Casnika smy Wam pśedstajili Marilyn Piaterowu, kótaraž we aktualnem zymskem semestrje na Lipšćańskej uniwersiśe serbšćinu w masterje za wótnabocnikow studěrujo. Jadnogo samego komilitona ma, a to jo Martin Růžička. Teke na njogo jo se Jill-F. Ketlicojc z pšašanjami wobrośiła.

Dobry źeń, kněz Růžička! Pšosym pśedstajśo se krotko našym cytarjam.

Ja póchadam z Českeje, som pak južo 15 lět w Chóśebuzu. We tom casu som se kaž pówołański tak teke wósobinski z regionom zwězał. Som 43 lět stary a wobglědujom Chóśebuz mjaztym ako swóju domownju.

Kaka droga jo Was wjadła k tomu serbskemu a k studiumoju dolnoserbšćiny?

Mója mamina rěc jo češćina, ale serbska rěc a kultura stej mě wjelgin znatej a lažytej mě na wutšobje. Nawuknjenje noweje rěcy – mójeje mjaztym stwórteje – mam za wjelike wobogaśenje. To mě njecyni jano wjele wjasela, ale rozšyrjujo teke mój horicont. Wušej togo mam za pśewšo wažne, w regionje, kótaryž co mjeńšynowu rěc aktiwnje pódpěrowaś a zachowaś, toś tu rěc znaś a powědaś. Z tym mógu pśinosowaś k zdźaržanju serbskeje rěcy a kultury.