Z Města/Cottbus. Źiśi, wukniki, młodostne a dalšne cilowe kupki mógu se nowym knigłam „Mission Lausitz: Abenteuer mit Vega und Cosmo“ chóśebuskeje firmy TripLeap UG (https://trip-leap.com/) wjaseliś. Awtorki tekstow su dr. Julia Korensky, Daria Glushkova a Maria Sobur. Natalia Zakharova jo knigły ilustrěrowała. Gromaźe z dwěma protagonistoma Vega a Cosmo zgóniju lazowaŕki a lazowarje wó nastaśu a wudobywanju wugla we Łužycy, wó LEAG, wó mašinach we wuglowych jamach, wó pśesedlenju wobydlaŕstwa, kótarež jo bydliło w jsach wobstojecych wótwórjonych jamow ako teke wó wužywanju energije. W srjejźišću stojtej teke flora a fawna we Łužycy. Serbska rěc, serbska kultura, serbske powěsći a nałogi graju wažnu rolu we knigłach. Samo krotki serbski crashkurs jo pódla. Za młodych lazowarjow, kótarež njeznaju nic wó Serbach, by mógali toś te knigły ako prědna lektura nimski powědajucych źiśi a młodostnych słužyś.